Urkunden – Detail

14.10.1400 / Einsiedeln

Abt Ludwig I. von Thierstein und das Kapitel von Einsiedeln bestätigen die Verleihung von Gülten an Rudolf Brun aus Zürich und halten die Bedingungen für einen Weiterverkauf fest.

Regest Seminar Sonderegger/Kränzle/Baumgartner 2008

Wir Ludwig von gottes gnaden abbt und wir dz cappitel gemeinlich des gotzhus ze den Einsidelen etca, tuon kunt menlichem mit disem brief und veriechen offenlich, dz für uns kam

Ruodolf Brun burger Zürich offnot vor uns, dz er dis nachgeschriben korn gülte, haber gülte, pfenning gült und huenren gült uff disen nachgeschriben guetern, hüsern, und hofstetten von

uns und unserm gotzhus ze lechen hette. Und batt uns, dz wir im einen pfant schilling uff die gülte sluegin und sasten. Und sint dis die gülten, des ersten git Heiny Meyersteffen von Hoengg

von sinen guetern fünf fiertel kernen und ein malter haber, aber git er zwey fiertel kernen von des Singlis wisen gelegen in dem Mos und ein schilling pfenning swingeltes, aber git

er zwey fiertel kernen von der wisen genant die Brunwis. Item git Heiny Lindiner zwey fiertel kernen von einer iuchert reben gelegen an Halden und stosset an Meyersteffens


guot, anderhalb an Heinis Notzen guot. Aber git Heiny Lindiner und Uely Lindiner sin bruoder ein müt kernen, dry müt haber und ein huon, des selben zinses gat ein fiertel haber ab

einer iuchert reben gelegen an Klingen, und ein müt kernen und einlif friertel haber gant ab einer halben iuchert aker lit ze Rislislein, und ab einer iuchert aker lit ze

Brunnlen, und ab einer iuchert aker lit ze Vaden, und ab einer iuchert aker lit ze Leingruoben. Item git Steffen Snider von Singlis guot ein müt kernen und einlifthalb fiertel

haber, ein schilling pfenning swingeltes und ein huon. Item git Ruedi Albrecht ein fiertel haber und ein huon von Heinis Zwifels hus und hofstatt by dem Brunnen gelegen. Item

git Chueny Grosman ein fiertel haber von einer halben iuchert reben ze Lachen gelegen. Item git Bertschy Lufinger von Affoltren ein fiertel kernen und ein fiertel haber von


einer iuchert reben lit ze Bechlen, aber git er ein fiertel haber und ein huon von zwein kamer reben, ligent ze Bechlen in dem Bifang. Item git der Riso der bredyerb ein fiertel

haber von einer halben iuchert reben ze Bechlen an dem Bachtal gelegen. Item gent spittaler ein fiertel haber von driu iuchert akern ligent in Althusen. Item git Heiny Notz

zechen fiertel haber und ein schilling pfenning swingeltes von Heinis Kilchherren hofstatt. Item git die Wülfligerin drü fiertel kernen von einer iuchert reben lit ze Bechlen

in dem Bifang. Item gent die frouwen in dem samnung ein fiertel kernen von der hofstatt, do ir trotten uff stat. Item git Heiny Wisso zwey fiertel haber von dem aker ze

Wisswang und ein fiertel haber von dem aker under Talchen. Item git Heiny Bury ein fiertel haber von dem aker ze Vaden. Item so gent Hans Himeler und Cueny Himeler zwey


fiertel haber von dem aker uff Bratenlouw. Item git Hans Himeler ein fiertel haber von dem guot, dz Hans Hertzog hatt. Item git Cueny Himeler ein fiertel kernen von dem

aker in Rütinen. Item git der Stebler ein fiertel haber von hus und hoffstatt. Item git Ruodolf Brunner der schuomacher ein fiertel haber von einer iuchert reben lit ob dem

Mos, stosset obnen an der Schriberen reben. Item git Wernly Schirmeyer zwey fiertel kernen von einer iuchert reben gelegen vor der gassen. Item git Haensly Sidler ein fiertel kernen

von Wernlis hus und hoffstatt. Item git die Zwiflin ein schilling swingeltes und ein halb fiertel habern. Und won der egenant Brun uns und unserm gotzhus nutzlich dienst und

trüw getan hat und fürbas wol getuon mag und sol, so haben wir obgenanter apt Ludwig und wir dz cappitel sin ernstlich bette angesechen und verhoert, und hant im uff dis


vor geschriben gülte alle hundert guldin und fünfzig guldin guoter und geber an gold und an gewicht ze einem werenden pfand geslagen und gesetzet an alles abmessen. Wir

haben ouch dem egenannten Ruodolf und sinen erben gunnen und erlouben inen mit kraft ditz briefs, die vorgeseiten gülte alle iekliche besunder in pfandes wise ze haben ze niessen

besetzen und ze entsetzen wie sy wellent. Also dz sy daran nieman bekümbern noch irren sol in enhein wise, es wer dann, dz wir oder unser nachkomen die vorgeseiten gülte

umb die obgenanten hundert und fünfzig guldin ouch guoter und geber an gold und an gewicht loesen woelten, des haben wir ewenklich wol gewalt ze tuond an all absleg der nützen

an geverd. Verkoufte ouch der egenant Brun oder sin erben dise vorgeschrieben gülte sament oder besunder, welche der gülte ützit von inen kouffent, dien sol dar umb als ir recht


behalten sin, und den pfantschilling nutzen und niessen ze gelicher wise, als der Brun oder sin erben taeten, ob sy unverkouft hetten an geverd. Und ist ouch diese vorgeschriben

satzung und pfandung beschechen mit aller der sicherheit sitten, worten und werken, so her zuo notdürftig wz, dz es nu und her nach kraft haben sol an all widerrueffung ane-

geverd. Wer ouch, dz ieman dise vorgeschriben gueter do dis vorbenempten gülte abgand, sament oder ir deheines besunder nu oder her nach verkouffen oder versetzen woelt,

das sol man vor uns und unsern nachkomen vertgen und do gewinnen und verlieren und niendert anderswo, won ouch die gueter mit dem grund von uns und unserm gotzhus

erb sint. Und her ueber ze einem offenn urkund, so haben wir der obgenannt apt und wir dz cappitel unsre insigel offenlich gehenket an disen brief. Der geben ist an dem


nechsten donstag vor sant Gallen tag in dem iar, do man zalt von gottes geburt vierzechenhundert iar.

Übungstranskription Seminar Sonderegger/Kränzle/Baumgartner 2008