Urkunden – Detail

1.5.1384 / Zürich

Peter von Wolhusen, Abt von Einsiedeln, schenkt dem Kloster Töss seine Leibeigene Gertrud, Tochter von Johans Reiman vom Beinhof, deren Sohn Hensli und alle künftigen Kinder.

Regest aus Regesten StA ZH, II, Nr. 2959

Original im Staatsarchiv Zürich: C II 13, Nr. 374.

Wir Peter von Wolhusen, von gottes gnaden abt des erwirdigen gotzhus ze den Einsidellen, sant Benedicten ordens, in Chostenczer bystuom, tuen kunt und vergehen offenlichen mitt urkund dis brieffs fur uns und unser nachkomen allen den, die in ansehent oder hoerent lesen, daz wir Gerdruten Johans des Reinmans seligen tochter von dem Reynhoff, die unsers gotzhus eygen was, sin kint heist Hensli und allu du kint, die von der egenanten frouwen lib komend, mitt guotten friien willen und lutterlichen durch gott geben haben und geben mitt urkund dis brieffs an daz gotzhus ze Toesse und daz sy des selben gotzhus eygen sigend und da hin gehoerend und dar umb so haben wir fur uns, unser nachkomen uns entzigen und entzihent uns och offenlichen der egenanten Gerdruten und die kint die von iro lib komen, mitt urkund dis brieffs nu und hie nach und daz wir, noch unser nakomen, niemerme kein ansprach an si haben soellen weder mitt geystlichen noch weltlichen gerichten, noch an gericht, noch mitt enkeinerley sach an geverd und des ze einem waren, stetten, vesten urkund, so da vor geschriben stat, so haben wir unser abtylich ingesigel offenlichen gehenkt an disem brieff, der geben ist Zurich an meiien tag, do man zalt nach Crystus geburt druzehenhundert und achtzig jare dar nach im vierenden jare.

nach Prof. Leon Kern, Bundesarchivar