Urkunden – Detail

9.2.1557 / -

Lehenreversbrief von Anndres Hinnen von Rümlang, worin er bestätigt, verschiedene Güter bei Rümlang von Abt Joachim Eichhorn für 1 Mütt Kernen und 14 Haller jährlichen Zins als Erblehen erhalten zu haben. Es siegelt Felix Kofelts, Vogt von Rümlang.

Das Regest wurde 2011 mit Hilfe des Summariums im Rahmen des Urkundenprojekts 2 erstellt.

Ich, Anndres Hinnen sesshaft zuo Rümlanng, bekenn offennlich mit disem brief, das ich vonn dem gotzhus Einsidlen ein besigletenn erbleehen brief innhab von wort / zuo wort also lutennde: Wir Joachim von gottes gnaden apt des würdigenn gotzhus unnser lieben frowen zuo den Einsidlen sannct benedicten ordens, inn / Costanntzer bystumb gelegenn one mitel dem heilligen stul zuo Rom allernechst zuogehörig, bekennen unnd thund khund allermengclichem offenbar mit / disem brief, das wir für unns unnser nachkommen unnd gotzhus dem erbarn Anndres Hinnen, sesshafft zuo Rümlang, unnd allen sinen erben uff / sin unnderthenig pitt zuo einem rechten steten ewigen erbleehenn unnd nach erbleehennsbruoch unnd recht gnedigclich gelichenn unnd verlichen / haben. Unnd lyhen im hiemit wüssenntlich unnd wolbedacht inn crafft dis briefs nammlich inn der zelg gegenn Breitennstein item ein iuchart / ackers genammpt uff der haltenn, stost an Uoli Kouffmanns güeter zuom annderen an der huben holtz unnd zuom dritten an die Meyen höfere inn der zelg / gegenn Eich. Item ein iuchart ackers zuo Bösenn weg, stost einsyt an Hanns Herschenn güter vornnen an Hans Widmers güeter unnd zum dritten an / herr Fridli Koller des predicannten güeter inn der zelg gegen Leewerböümli. Item dry fierling feldts im boden unden genannt Meyers Breiti / stost einsyt an Howweg so inn die Lorenn wiss\ gat, annder syt an der Rordorfer güeter unnd zum dritten an Gorius Hegelers. Item ein manmad / höwwachs im Grüth, oben stost ein syt an Hanns Clingers wiss annder syt an der Rordorfer güeter unnd zum dritten an des gotzhus guot. Unnd dann / so lyhenn wir im nach an zal unnd gebür hienach bemelts zinses holtz gerechtigkeit im gemeinen holtz unnd die rieths gerechtigkeit also das er / söllichs nutzen unnd niessen möge wie von alter unnd bisshar ungeuarlich mit semmlichem geding unnd inn dem rechten. Das er unnser leehenman / unnd sin erben jetz beschribne stuock unnd güter nuon hinfüro sammentlich nach erbleehenns bruch unnd recht inn habenn buwen nutzen niessen und / bewerbenn mögen die inn guten wesennlichen zyt büwen unwüestlich unnd unnzergenngclich halten. Doch so habenn wir im ussgnaden har inne / nachgelassenn. Das er unnd sin erbenn obbestimmpte stuck unnd güeter wol versetzen unnd ire recht daran verkouffen mögen. Doch unnserm / gotzhus an sinen fryheitenn zinsen unnd gerechtigkeiten inn allweg one schaden unnd ouch mit dem vorbehalt. So er unnser leehenman und / sin erben sölchs über kurtz oder lanng zyt thun, semmliche güeter als vor stat versetzenn oder verkouffen wellen. Das er söllichs allweg unns / unnsern nachkommen oder ammptlüten zuvor an zeigen, unns am ersten feil unnd anbieten unnd unns fünff schilling neher dann anderlüt / dar zuo kommen lassen söllen. So aber wir nit kouffen oder daruf lyhen welten, als dann möge er wol sin recht der erbleehennschafft gegen / anndern togennlichen personnen, so unns oder unnsern nachkommen angenem unnd obgeschribne güter zuo buwen unnd zuo verzinsen ver / mögenlich unnd geschickt sigen, versetzenn und verkouffen. Doch so sölchs der gestalt verkoufft würt oder ein herr des gotzhus Einsidlen oder / ein leehenman mit tod abgat, so soll allweg der eltist huss halter oder der koüffer semmlich leehenn von einem nüwen herren mit erlydung / zimmlichs unnd gebürlichs brief costen allweg widerumb emmpfahen. Der selb unnser leehenman unnd sin erben söllen ouch unns und unsern / nachkommen von usser unnd abe allenn obbestimmpten güetern hinfüro alle jar jerlich unnd eins jeden jars allein unnd besonnders uff / sanct martins tag sammenthafft von einer hannd unzerteilt zuo rechtem ewigem grund unnd erbzins ussrichten unnd inn unsers gotzhus / hof gen Zürich antwurten unnd weren. Nammlich ein mütt kernnen unnd vierzehenn haller Züricher mess unnd müntz one fürwart / sonnder genntzlich one unnsers gotzhus costen unnd schaden. Wa aber er oder sin erben an hie obgeschribnen stucken unnd artickeln / einem oder mer sümig sin unnd ein zinss den anndern unnd der annder den dritten unbezalt wider unnsern willen gevarlicher / wyse erlouffen lassen wurden, so mögen wir unnser nachkommen herren oder ammptlüt obgemelte stuck unnd güeter sammenthafft / (als verwürckt) zuo unnsers gotzhus hannden fry ledig züchen unnd füro damit hanndlen als mit anndern desselben eignen heim- / gefallnen güetern ir unnd mengclichs halb daran ungesumpt, unverhindert unnd inn allweg unansprechig. Vor welchem allem inn / unnd sin erben nie mer nichtzit schützen nach schirmmen soll. Dann er sich der unnd aller annderer schirm unnd behelff so iemand hiewider / erdencken könnd ald möcht genntzlich verzigen. Der obgenannt Anndress Hinnen hatt unns ouch von des leehens wegen einen eid / lyplich zuo gott geschworen, unns und unnsern nachkommen getrüw diennstlich unnd gewerttig ze sind unnd alles das zethund so getrüw / leehennlüt irm leehenn herren von billicheit und rechts wegen zethünd pflichtig sind. Und ob er jenndert verschwigne leehenn / wüste oder fürer vernemmen wurden, so von unnserm gotzhus leehen unnd nit empfanngen werren, die uns unnsern nach- / kommen oder amptlüten für zepringen unnd zuo leiden alles erbarlich unnd ungevarlich. Unnd das zuo warem offem urkund, / so haben wir unnser apty secret gewonlich insigel für unns unnser nachkommen unnd gotzhus offenlich hencken lassen an / disenn brief, der geben ist an zinstag nach sanct Agatha tag nach christi gepurt gezelt fünffzehenn hunndert fünfftzig unnd / siben jar. Unnd damit hochgenannter min gnediger fürst unnd herr unnd siner gnaden nachkommen wüssen mögen, wie unnd welcher / gestalt sy mir gelichenn, so hab ich inen disen brief inn bekanntnuss unnd revers wyse zuogestelt unnd zuogezügcknuss mit ernst / erpetten, den ersammenwysen Felix Kofelts, des raths Zürich die zyt vogt zuo Rümlang, das er sin eigen insigel für mich unnd min / erben doch der statt Zürich ouch der clöstern unnd allen anndern sonndern personnen an iren zinsen zehennden fryheiten unnd ge- / rechtigkeiten des glychenn ime vogt unnd sinen erben in allweg one schaden offenlich gehenckt an disen brief der geben ist uff den / tag unnd inn dem jar wie ob stat.

Arbeitstranskription im Rahmen des Seminars "Vom handschriftlichen Dokument zur digitalen Quelle" an der Universität Luzern, Frühjahrssemester 2011.