Urkunden – Detail

15.6.1558 / -

Hans Aberli, Vogt zu Reichenburg, erneuert den Gültbrief zwischen dem Kloster Wurmsbach, vertreten durch Hans Rüsi und Gallus Hegner, einerseits und Ueli Kistler und Andres Isthan anderseits, auf deren Gütern genannt Rütinen die Unterpfand lastet.

Das Regest wurde 2011 mit Hilfe des Summariums im Rahmen des Urkundenprojekts 2 erstellt.

Ich Hanns Aberli der zytt des hochwirdigen geistlichen fürsten unnd herren hern Joachim abt des wirdigen gotzhuss Einsidlen mines gnedigen lieben herren vogt zuo Rychenburg / bekenn unnd thuon kundt mengklichem mit disem gegenwirtigen brieff das ich an statt und in namen usgedachts mines gnedigen herren, offentlich zuo gricht gsessen bin, kam da für mich und / ein offen verbannen gricht die ersamen wysen Hanns Rüsi der zytt buwmeister zuo Rapperschwiyle, Gallus Hegner alt stathalter inn der March bed als gsannte poten unnd voll- / mechtig gwallthaber des gozhus Wurrmspach liessend reden durch iren erloupten fürsprechen wie vorgedachts gozhuss ein jerlichen zinss zu Rychenburg heige namlichen uff / zweyen stück gütern die man die Rütinen nemi darum sy dann brieff unnd sigel darlegten. Man kondt aber inn solchem brief nit verstan das da unnderpfandt mit kennen anstössen / genampt wurden si wanten aber für man heig innen des jerlichen zins allwegen gütlichen ussgricht unnd sye inen kein intrag nye beschechen dem selbigen vor sin dz es furderhin / nit zuo geschechen ein ursach bringen möchti begertens das man inen brief unnd sigel in irem costen geben unnd ufrichten welli. b[e]gerent ouch nüt wyters dann wie der vordrig brieff / wyse, usgnon die anstöss solcher unnderpfand zuo ernemen unnd melden daruf Uli Kisthler und Anderes Isthan alls die so die güter innhanden unnd dess zinsses kanntlich / waren dan sy (als si verhört wurden) nit konten absin si hetten solchen zins etlich meng jar ussgricht nit vil antwurteden nach antwurten liessen. Daruf ward die sach / von gmelten gwalthabern zuo recht gsezt ob sölich ir fürbringen nit billich beschechen solti da fragt ich obgmelter richter unnd ward nach miner umfrag zuo recht erkhenntt / die wys die innhalter der unnderpfannde dess jerlichen zinsses nit ab werind sonnder fry bekanten dz solchen zinss ein zytt lanng usgricht hetten so solten sy solche underpfand mit [begriffenliche] / anstössen melden und zeigen, unnd solti dann der vorig alt brieff mit sinem innhalt puncten articklen und jar zal herine vergriffen unnd gschriben werden darnach der selb alt brieff / thodt unnd craftlos sin heyssen hin weg unnd abgethan werden unnd diser brieff nun hinfür in allweg mitt allem inhalt ganntz ganntz in kreften bstan unnd blyben on alles wider- / reden. Nach ergangner urtheyl hatt Uli Kisthler zuo ein rechten unnderpfand zeigt sin guott Rüti genant zuo Rychenburg glegen stosst erstlich an syn huswesen Platen genant wie / ein hagmal zeigit zum andren an grosen berg zum tritten an die schwenken die genant wirt fluors Rütti unnd an das ruotschis holz. Item Andres Isthan hatt zeygt syn guott / Rüti ouch zuo Rychenburg glegen stosst zum ersten an Kuonrat Leyssen Rüti zum andren an das len zum thritten an Wirzlis hirzboumen an Hans Yselis husswissen gnampt des / Billgeris unnd an Hans Metlers husswissen. Der alt brieff wysst unnd seyt das Ruodollff Schueller ein hoffman zuo Rychenburg heig gsezt dryzehen pfund gelz Ruodollff / Meilen einem burger Zürich und siner hussfrouwen unnd sy solcher kouff beschechen um zwey hundert und sechzig pfundt haller darvon sind abglösst worden sechs / pfund gelz mit hunderd unnd zwentzig pfund haller. Item unnd sind solche unnderpfand on den vorgschriben zinss vor ledig unnd losz ufgnon ein fiertel kernen armen / luten und ein mas anck[en]unnd ein schillig pfenig und allso mit selichem geding wer selche under pfand innhalt nutzet unnd brucht sol gmelten Meyli sin nachkomme / oder dem der disen brieff mit recht innhatt jerlichen ussrichten dryzechen pfund haller was iezmal nitt abglöst ist uff sannt Martis tag acht tag vor oder nach on- / gfarlich zuo rechtem zins mit guter lannts werschaft zuo rechtem zins überantwurten. Wo aber solichs nit bschechi unnd der inhalter diser unnderpfannd sümig sin wurdten / dem innhalter dess briefs oder iren gwüssen bottschafft den zinss jerlich nit erleyten uff zit unnd tag unnd inn massen wie vorstadt was costen oder schaden sy darvon empfenge / mit grecht botten lon zerung nachslagen nachfaren rytend oder genndt sol innhalter diser unnder pfannd von jerlichem sümigen zil hinfur verstan ledig und loss machen / vur gfallnen zinss unnd allen kosten unnd schaden. Item dieser brief ist ablösig wann unnd welches jars der innhalter diser unnderpfanden uff sannt Martis tag acht / tag vor oder nach kont mit sechzig pfundt haller guter lannts werschaft doch nit minder so sol mans nemen unnd solchi unnderpfand um sovil ledig lassen unnd fur[d]er nutt zuo- / noten han unnd ye für zwentzig pfund haller ein pfund gelz lassen abgan. Solichen alten brieff hatt bsiglet ghan Hanns Stappfer ein ambtman mins gnedigen / herren von Einsidlen dess selbigen brieffs datum gwissen hatt dz er sy geben uff nun zechenden tag herpstmaned do man hatt zelt fierzehen hundert zwentzig und nün / jar. Item disser brieff ist vor gricht glesen worden unnd erkhant dz er gschryben sy wir urtheil gen hatt. Unnd das alles zuo gloublichem schyn und urkund / so han ich obgnanter richter von wegen der urtheil unnd empfelchens dess grichts min eigen innsigel doch unnserem gnedigen herren unnd eurem wirdigen gotts- / huss Einsidlen an Jren zinssen turen fryheytten rechtungen und grechtikeytten ouch dem hof Rychenburg und dem gricht mir unnd minen erben und nachkommen / allwegen onschädlich offentlich an disen brieff gehenckt der geben ist uff den funffzehenden tag brachmanet do man zalt von Cristus unnsers erlösers unnd / selig machers gepurt thusend funffhunder funffzig und acht jar.

Arbeitstranskription im Rahmen des Seminars "Vom handschriftlichen Dokument zur digitalen Quelle" an der Universität Luzern, Frühjahrssemester 2011.