Urkunden – Detail

30.6.1548 / -

Bartli Kistler, Hofjunker in Reichenburg, bestätigt, dass er Jacob Kistler, Landmann in der March, jährlich 5 Pfund Geld ab seinem Hof Grossbürglen in Reichenburg zinsen soll. Es siegelt Johannes Aberli, Vogt von Reichenburg.

Das Regest wurde 2011 mit Hilfe des Summariums im Rahmen des Urkundenprojekts 2 erstellt.

Ich Bartli Kysthler, hoffjunger zuo Rychenburg, vergich unnd thun khundt alermengklichem mytt dysem brieff, das ich für mych unnd all myn / erben unnd nachkomen uff recht unnd redlich schuldig bin unnd jerlich zinßen sol dem bescheidnen Jacob Kisthler lanndtman in der March fünff / pfundt geltz uß von unnd ab minem eignen guot groß Bürglen genampt zuo Richenburg gelegen. Stoßt des ersten an des Bockhen Bogenrüdtj unden / uff an den Howalt nebet an die kleyn Bürglen nitzich an der vorgemelten Bocken halten von fry ledig unnd eigen das nütt daruff stadt / noch stan sol ußgenomen ein fiertel kernen unnd sechzechen anngster miin gnadigen herren oder einem gotzhus zu Einsidlen unnd ein fiertel / kernen sannt Kathrina pfrundt zuo Thuggen. Unnd also mitt dem geding, wer diß vorgemelt unnderpfanndt von dyß hin imer im inhatt / nussett oder buwett, dem obgenampten Jacob Kysthler sinen erben und nachkomen oder dem so disen brieff mitt recht innhatt aller jerlichen / unnd yetes jars besonnders uff sannt martis tag acht vor oder nach unngefarlichen funff pfundt haller gutter und gennger unnferrueffter / Lamdtz werschafft so genng unnd geb sy im hoff zu Richenburg zu iren sicheren ghalt unnd gwalt on alles ver ziechen zu rechtem zinnß / inntwurten selen. Were aber sach, das im syn zinnß jerlich nüt gewert wurdt inn mosen wie vor stadt alls dan sol unnd mag der dyser / brieff mitt recht inhatt, wol uff das obgemelt unnderpfanndt gan unnd das anngriffen mitt pfenndten noch gewonnheyt zins gannt unnd hoffs / recht zuo Richenburg. Ouch hatt mich gemelter Jacob Kisthler angethingett, das ich oder wer diß verschriben unnderpfanndt innhatt nutzett / unnd brucht, die stur, so mim heren oder eim wirdigen gotzhus Einsiden hört, ußzerichten von jar ze jar on des der den bryeff innhatt / emgeltnus unnd abganng ouch ouch onn allen sinen costen unnd schaden ouch an verhinndernus siner brieff unnd siglen darvor mich myn erben / unnd das unnderpfandt nütt schützen nach schirmen sol. Doch ist dem inhalter des unnderpfanndts die früntschafft unnd gnad gethan / allse wer unnd welches jars er kumpt uff sannt Martis tag acht tag vor oder nach unngefarlich mitt zwentzig pfunden unnd allem uß-/ stenndigem verfalnem zinß so sol mans von im nemen unnd item sin gut um so vil ledig lasen und furer nutt zu nötten han. Ich / ogenampter Bartli Kysthler loben ouch in krafft diß brieffs, dem uwerdachten Jacob Kisthler oder den so disen brieff inhatt, uff dem / benempten unnderpfannd recht wer unnd troster zu sin, so lanng bis sy um lanntz oder hoffs gwer dar by schirmt unnd sy daran habendt / sinndt unnd inn gnuag bschicht und den verfallnen zins. Unnd das alles zu einem waren steten ersten urkundt / aller vorgeschriben dingen, so hab ich, dick gemelter Bartli Kisthler, mitt ernst gepetten unnd erbetten, den fromen fürnem unnd wisen / Johannßen Aberli, der zitt des hochwirdigen geystlichen fürsten unnd heren heren Joachim apt des wurdigen gotzhuß Einsidlen vogte / zu Richenburg, das er sin eigen innsigel fur mich unnd all min erben unnd nachkhomen, doch im unnd sinen erben unnd nach- / khomen, ouch minem gnädigen herren unnd eim gotzhus alwegen an sinen zinßen sturen fryheytten unnd grechti keyten onnfergriffen / unnd onschädlich offennlich hatt ghenngkt an disen brieff, der geben ist des jars zalt von Cristus unnsers erlösers unnd / lieben herren gepurt gezalt thusendt funnffhunndert fyrrtzig unnd acht jar uff den letsten tag brachmonetz.

Arbeitstranskription im Rahmen des Seminars "Vom handschriftlichen Dokument zur digitalen Quelle" an der Universität Luzern, Frühjahrssemester 2011.