Urkunden – Detail

1.11.1587 / -

Revers von Fridlin Zuber von Wagenhausen um anderthalb Jucharten Acker an der Breiten am Tägerfeld, welche ihm von Abt Ulrich Wittwiler als Huberblehen verliehen worden sind.

Das Regest wurde 2011 mit Hilfe des Summariums im Rahmen des Urkundenprojekts 2 erstellt.

Ich, Frydlin Zuber von Wagenhusen bekhunn offenlich mit disem brief, das ich ein sömlichen besigleten huoberblechenbrieff / innhab vonn dem hochwürdigen fürsten unnd herren, herren Ulrichen abbte des würdigen gotzhus Einsydlen und minem gnedigen herren, wellicher von wort zu wort / allso luttende. Wir Ulrich von Gottes gnaden abbte des würdigen gotzhuss unnser lieben frowen zuo den Einsydlen das onne alles mittel dem heilligen / stuol zuo Rhom zuogehörig sannt Benedicten ordens unnd inn Costanzer bistum glegen bekhenend offenlich mit disem brieff das wir uff hüt siner dato / dem ehrbaren Frydlin Zuber, wonhafft zuo Wagenhusen, unnd sinen erben uff sin underthenig pitt, anderthalb juchart acher an der Breitten am Tägerfeld / glegen stost gegen sonnen uffgang an des Schalckhusern, gegen nidergang an Adam [Schmiukers] acher, unnden unnd oben an die lanndstras unnd kilch- / weg zuo einem huoberblechen, gelichen unnd verlichen habent. Unnd lichent inn hiemit wüssentlich inn crafft dis briefs was wir ime von bil- / licheit unnd rechts wegen daran zuoverlichen hand lichen söllend unnd mögend doch unns unsern nachkomen und gotzhus, unnsers recht daran vorbehalten / ouch an der lechennschafft unnd sonnst inn al ander weg onne schaden dergstalt das gemelter Frydlin Zuber unns unnd unserm Gotzhuss von und ab / bestimpten anderthalb jucherten achers jerlich uff sannt Marttinstag annderthalb viertel kernenn unnd anderthalb viertel haber Steiner mass / guots subers kernens unnd habers guetigclichen richten unnd inn unnsern spycher gen Aschentz zuo unnsers amptmans sichern handen und gwalt / antwurten soll onne inntrag unnd widerred besonnder onne unnsers gotzhus costen unnd schaden. Wa aber der bemelt lechenman sümig und ein / zinss den andern unnd der ander den dritten unbetzalt erloufen liesse so söllendt alsdann unnserm gotzhuss sömliche andernhalb jucharten / achers verwürckt heimgefallen sin der genant Frydlin Zuber hatt unns ouch einen eyd liplich zuo Gott unnd den heilligen mit ufgehepten / fingern unnd glertten wortten geschworn unns unnd unnserm gotzhus getrüw diennstlich unnd guonstig zesind unnd ob er jemert verschwigne / lechen wüste oder für es vernommen wurde die von unnserm gotzhus lechen unnd nit empfangen werent die unns ald unnsern nachkomen fürze- / bringen unnd zeleiden unnd wan ouch wir oder der gedacht lechenman (wellicher sich begibt) mit tod abgangen und ein nüwer here zuo Einsid- / len erwelt wirtt soll sömliche anderhalb jucharten acher widerumb von uns oder unnsern nachkommen ennpfangen unnd mit dem gwonlichen / lechen schilling uns erschatzet werden. Wir habent ime ouch uss sonndern gnaden nachglassen allso das er bestimpten acher wol mag versezen / verkouffen oder inn andmewng damit handlen nach sinem willen unnd gfallen und doch soll sölliches der lechenschafft inn alweg onne schädlich / beschechen unnd so offt sich das lechen endert, gemeldet unnd annzeigt werden getrüwlich unnd ungevarlich so unnd des zuo / warem urkund. So habent wir unnser abbty gwonlich samet inn sigel offenlich hencken lassen an disen brieff der geben ist den ersten tag / novemberis von Christi gepurth getzelt thusendt fünfhundert achtzig unnd syben jare unnd dannit wo gemelter min gnediger herr wüssen / haben möge wie unnd wellicher massen sy mir gelichen unnd ich hievon zechnen schuldig so gib ir fürstlich gnaden ich disen brief in bekanndtnus / unnd reuers wise des zuo gezügnus uss minem pitt mit des edlen und werten jungker Christof von Feyers zu Freudenfels eignen ange / pornen insigel besiglet ist doch ime unnd sinen erben inn alweg onne schaden der geben ist uf den tag unnd jar als obstath.

Arbeitstranskription im Rahmen des Seminars "Vom handschriftlichen Dokument zur digitalen Quelle" an der Universität Luzern, Frühjahrssemester 2011.