Urkunden – Detail

7.1.1553 / Zürich

Der Bürgermeister und der Rat der Stadt Zürich sowie die Zunftmeister erlauben dem Bürgermeister Johanns Hab, sein Grundstück einzuzäunen, das durch fremde Personen als „sanitäre Anlage“ benutzt und verunstaltet wird.

Regest Seminar Sonderegger/Kränzle/Baumgartner 2008

Wir bürgermeyster der nachgeschribenn rath unnd die zünfftmeister gmeinlich der statt Zürich thund
khunt mengklichem mit disem brieff. Nachdem der from vest fürsichtig wyβ unser besonnders getrüwer lieber bürgermeist-
er her Johanns Hab, uns eroffnet, wie im der platz hinderthalb an syner behuβung, under synem für schutz oder sinner loubenn
uff dorff gelegen, so da stosst an den platz gegen unnser statt ringmur an der hütten von den kinden unnd alten personen teglich
verwüst, unnd inn annder weg dermassen beschwert, das er dasselbs weder holtz noch annders behalten ald schirmen köndte, deβ
glychen im ouch kein lufft inn syn behuβung unnd keler komen mochte, unnd uns daruf mit flyβ ganntz früntlich gepett-
en, wir wolten im bewilligen unnd zulassen, das er gemelten platz infaβen unnd den von mengklichem onnerhindert nach
synem gefallen unnd notdurft nutzen unnd bruchen bedörfte. Unnd wann un unser statt verordnete buwmeister uss
unnserem berelch, uff söllich pitt unnd ansuchen hingerürten platz besichtiget unnd uns volgende nach der lenge berichtet, wie
unnd wellichermaβ es ums sömlichen platz eyn gestalt, unnd das er namlich den rychstraβ unnd gmeyner statt one nachteyl
ingefasset unnd genanntem unnserem bürgermeister inn dieser syner früntlichen pitt , one mengklichs widenred unnd schaden,
sonnder ouch diewyl er sollichen platz inn tach, ouch eyn gang durch eyn thüren uβ unnd in gewanndlen habe wol gewillfar-
et werden möge. Deβglychen wir uns ouch darnebent erinert unnd bedacht das jetzuermelter unnser bürgermeister biβ-
har unnser statt an synem beuolchnen amptt trüwlich eerlich unnd redlich gedient unnd ouch dero fürer inn iren obligenden
geschefften unnd sachen wol gedienen kan mit wellichem dann er umb unnser statt groβers, dann eyn söllichs verdient und wyter
beschulden mag, so habent wir in ausechen des alles genantem her Johanns Haben unnserem burgermeister bewilliget unnd zuo-
gelaβen vergünstigen unnd bewilligend im ouch hie mit inn krafft dieβ briefss, mit namen das er den vilgenantenn platz
hinder syner behuβung unnder syner seiner lauben oder fürshutz so wyt unnd feer diesselbig lauben usslin werts begryft
unnd weiche zufassenn unnd verschlachen. Auch er unnd syne erben der also zubeschlossen behalten unnd nach irem nutz
willen und gefallen , bruchen unnd nutzen mögen, von uns, unnsern nachkomen, unnd suss aller mengklichem daran gantz
ungesinnet , ongeirt unnd unner hindert inn allweg. Deβ zu gezugknus unnd warem urkunt, gabent wir genantem unser-
em bürgermeister disen brieff mit unnser statt Zürich gmeynem anhangendem insiegel verwart sontags den sibenden tag
wolffmonats nach der gepurt Christi gezahlt funffzechenhundert fünfftzig und drü jar. Unnser des rats namen findi
Rudolf Stoll, Hanns Cuonrat, Ascher Lorentz zur Eich, Mar Ascher, Felix Bertschinger, Jacob Röust, Ruodolf Vögeli, Hanns Eber-
Bach, Heinrich Kambli Bernhart Sprüngli, Jakob Rordorf, Ruodolf Schwytzer, Unnser der zunftmeister namen sind Ande-
reβ Geβner, Jörg Müller, Hanns Brem, Casper Gumper, Hanns Kambli, Heinrich Kramer, Hanns Walder, Hanns Rien, Hanns
Breyttensteyn, Wilhelm Ulig, Bartlame Köchli unnd Lux Esslinger.

Coram senatu

Übungstranskription Seminar Sonderegger/Kränzle/Baumgartner 2008