Urkunden – Detail

16.1.1516 / Zürich

Johann Fritz, Hermann Ott, Hans Walder, Konrad Häginer, Rudolf von Ägery, Hans Ulrich Stampfer, Hans Güdy, Hans Giger, Rudolf Stoll, Hans Löw und Kaspar Frei gründen eine Bruderschaft, um gemeinsam für ihr Wohl Messen zu stiften.

Regest Seminar Sonderegger/Kränzle/Baumgartner 2008

Im namen heiliger drivaltigkeit amen. Kundt und wüssent sye allen denen, so diszen brieff sehent oder hörent leszen, | das wir nachbenempten Johann Fritz priester, Herman Ott ferwer, Hanns Walder an der Schipffy, Connrat | Häginer, Rudollff von Ägery, Hanns Uolrich Stampfer, Hans Güdy, Hans Giger, Ruodollff Stoll, Hans Löw unnd | Caspar Fry mit wolbedachtem synn und mut guoter vorbetrachtung, voran dem allmechtigen gott | und siner muoter Maria zuo lob ouch zuo eren dem heilgen notthellffer sannt Batten und unnsern seelenn | zuo trost allss billger und bruoder dess genanten sant Batten brüderschafft diss nachgemelte ordnung | angesehen und also zuohalten einhellenclich angenomen zuogesagt und versprochen haben. Dess | ersten das wir alle jar uff sannt Batten tag vierzechen tag vor oder nach ungevarlich ein messz | von sant Batten zeleszen verschaffen, und, wann einer under uns tods abgat, desselbigen sel zuo trost | innerthalb sinem drissigersten ouch ein selmessz lassen lesen, und sollent all by sollichen messen sin | und jeder zuo derselben messz zuo dem opffer und fromen gan, darvon sol sich nieman ussern, er | werd dann mit herren geschefften oder libs not verhindert. Und wie dick einer oder mer von | uns gen sant Batten gan welt, sol derselbig oder dieselben den anderen das zewissen thun, | damit ob inen etwelicher gen sannt Batten ein opffer zetragen bevelthe oder gebe, das er sollichs | daselbshin antwurten sölle. Witter wann es sich begeb, das unser einem ein erb (das got | lang wend), guotte ämpter, gross eer oder kinder usserthalb der ee anfielen, derselbig sol denn | den anderen ein mal geben, und welche das genossen haben, sol ein jeder ein batzen zuo letzy | lassen und deszhalb gnuog gethansin. Und ob inkünfftig zit wir uss erlichtung oben herab | begabet und rättig wurdent, mer brüder annzenemen, witer und ander ordnungen zemachen, | sollent und mögent wir thun und nach dem datum diss brieffs in oder uff disen brieff | schriben. Und damit solliche unsere lobliche bruderschafft onhergenngklich und in | eren langwirig halten, und wie obstat begangen werde, so habent wir zuo einem aman | und obman erwelt obgevurten meister Herman Otten und im zuo hellffern und by= | sizern geben Ruodollffen Stollen und Hansen Güdin ouch vorgenant, ein trüw uffsehen | zuohaben, damit dise artikell gehallten, die ubertretter gestrafft und diss bruoderschaft | zuo dem lob gottes sannt Batten zuo eren und unsern armen ellenden selen zuo trost gebessert | werde. Dess zuo warem vestem urkund so habent wir obgenanten bruoder mit grossem | vlis gebetten und erbetten den vorbestimpten meister Herman Otten, das er alls obman fur sich | und uns alle doch sinen und unsern erben zuo nachteil sin eigen insigel an disen | brieff gehenckt hat. Der geben ist Zurich inn der stat zuom weggen , uff mitwuchen vor sant | Anthonius tag alls man von Cristus geburt funffzechenhundert und sächzechen jar | gezelt hat. || [von anderer Hand ?] Richardus parens | die vi ijanuarij

Schipffy: Schipfe, Zürich
Caspar Fry: Kaspar Frei, 1515-1526 Stadtschreiber von Zürich
stat zuom weggen: Haus zum Weggen, Ecke Weinplatz/Weggengasse, Zürich

Übungstranskription Seminar Sonderegger/Kränzle/Baumgartner 2008